Incharhetanasti 242 mdp p'iarakuarhu uetarhenchantskuecheri jorhenkuarhikueri
2023-02-24 21:32:47
- Ampe enki uetarhejka incharhetanani tumina jintesti jorhenkuarhikuani, ka isï mojtakuni eratsekua: Bedolla
Morelia, Mich.- Tankuarhikuarhu ma enki no meni isï unampka, jimanki uanekua sapicha jampka, Juramuti Erechikueri, Alfredo Ramírez Bedolla, ma uenani intspesti uetarhenchantskuechani ka ukatechani enki piaranakasi 242 millones de pesos arhikatechampu, ka uantasti enki menki jauenaka isï ukuarhini jimpoka isï uetarhenaka.
K'eri tankuarhikuarhu ma enki unaka imarhu Estadio Morelos, jimanki japkasï 32 juramuticha iretecheri iapurhu anapuecha, Juramuticha Erechikueri ka Jorhenkuarhikueri, Gabriela Molina Aguilar, uantastisï enki ionimintu isï eratsenanapka, jimpoka uetarhejka sesi jorhenkuarhini sapicha. Uantastisï enki jarhoatanaka 94 mil jorhenkuarhirichani.
Alfredo Ramírez Bedolla uantasti enki majku anchikuarhinajka juramutichankuni kotsikua anapuechankuni tachani eratsekuecharhu, isï enki La Escuela es Nuestra, Internet para todos ka sesikua jimpo jorhempericheri. Iretecharhu jimanki nieranauaka jarhoajperakua jintestisï Jungapeo, Charo, Santa Ana Maya, Tacámbaro, Zitácuaro, Tarímbaro, Paracho, Coeneo, Cuitzeo, ka Erongarícuaro, ka mataruecha.
I jurhiatikuarhu, intsïnastisi uetarhenchantskuechani enki marhoakuaka 411 jorhemperakuechani, ka mantanini janokuatisï 76 mil ukatecha uetarhenchantskuecheri ka 24 mil urakuechani, ka incharhetanasti 84 millones de pesos.
Ka itku, Gabriela Molina uantasti, enki eiampenaka na enki upirinkasï k'urhajkuarhini, tachani ampempu enki uetarhempkasï, isï enki uemukuntanajka jorhemperakuecharhu, enki kome janteka ka matarhu ampe, ka itku miantasti enki juramuticha eratsejka anchikuarhinsï sesikua jinkoni ka sesi anchitani tuminani.
Molina Aguilar uantastistu enki uetarhejka enki iamintuecha majku jorhentanaka, ka sesi erankusti enki na anchikuarhinakasï juramuticha ixu anapu ka imeri Finanzas de Estado arhikata, Luis Navarro García, jimpoka menki jauenajkasi jarhoatani sesi jajkukuarhu jorhenkuarhikueri jimanki iamintuecha majku jorhentanaka.
Tankuarhikuarhu nirastisï juramuti DIF arhikateri, Grisell Tello Pimentel, secretario de gobernación, Carlos Torres Piña; juramuti Congreso anapu, Ana Belinda Hurtado Marín; secretario CCEEM arhikateri, José Roberto Santillán Ferreyra; jorhenkuarhiricha ka juramuticha iretecheri ka mataru k'uiripuecha.
